Forsíða‎ > ‎blog‎ > ‎

Fréttatilkynning

posted Nov 29, 2012, 12:48 PM by Ómar Þorsteinsson

Lionsmenn í Kópavogi styrka endurbætur á heilabilunardeild Sunnuhlíðar   



Í Kópavogi eru starfandi þrír Lionsklúbbar. Lionsklúbbur Kópavogs og Lionsklúbburinn Muninn eru karlaklúbbar, en Lionsklúbburinn Ýr er kvennaklúbbur.

Klúbbarnir hafa sameiginlega aðstöðu í Lundi, Auðbrekku 25.  Þar eru þeir með skrifstofur og myndalegan samkomusal, sem tekur um 200 manns í sæti. Eitt af markmiðum Lionshreyfingarinnar er að efla samheldni og félagsþroska og styrkja góð málefni í bæjarfélaginu. Eitt af megin verkefnum klúbbanna þriggja í Kópavogi gegnum árin hefur verið að hlúa að starfsemi hjúkrunarheimilisins í Sunnuhlíð. Lionsklúbbur Kópavogs og Lionsklúbburinn Muninn héldu veglegt herrakvöld síðast liðið vor. Samkoman var vel sótt og fylltu gestirnir félagsheimilið Lund. Veitingamaður staðarins, Árni Þorsteinsson, bauð upp á dýrlegt hlaðborð fiskrétta og menn skemmtu hver öðrum með góðum sögum og ræðuhöldum. Allur ágóði af samkomunni rennur til endurbóta á húsnæði heilabilunardeildar Sunnuhlíðar. Til að auka verðmæti gjafarinnar hyggjast félagar klúbbanna hjálpa til við uppsetningu innréttinga og tækja sem keypt verða fyrir það sem ágóði herrakvöldsins skilaði. 
 
Sömu klúbbar hafa haldið skötuveislu undanfarin ár við vaxandi vinsældir Kópavogsbúa. Skötuveislan í ár verður haldin í Lundi daginn fyrir Þorláksmessu, laugardaginn 22. desember, og mun allur ágóði af henni einnig renna til sama verkefnis í Sunnuhlíð. Kópavogsbúar og aðrir velunnarar Sunnuhlíðar eru hvattir til að mæta í skötuveisluna og leggja um leið góðu máli lið.
Comments